چمکنے لگا سر بہ سر نور ہو کر

چمکنے لگا سر بہ سر نور ہو کر

میں جل جانے والا نہیں طور ہو کر

نہ پاس آؤ اتنے چلو دور ہو کر

میں کچھ اور کہہ دوں نہ منصور ہو کر

نہ ترساؤ ہر گام پر دور ہو کر

کوئی ہار بیٹھے نہ مجبور ہو کر

یہ کس کے لیے جان دینے چلا ہوں

چلی آ رہی ہے قضا حور ہو کر

حدیں عشق کی کر رہے ہیں وہ قائم

کبھی پاس آکر کبھی دور ہو کر

نہ جینے سے خوش ہوں نہ مرنا روا ہے

یہ جینے میں جینا ہے مجبور ہو کر

میں مجذوبؔ ہوں جذب الفت سلامت

بچو گے کہاں مجھ سے تم دور ہو کر