جو چپ بیٹھوں تو اک کوہ گراں معلوم ہوتا ہوں

جو چپ بیٹھوں تو اک کوہ گراں معلوم ہوتا ہوں

جو لب کھولوں تو دریائے رواں معلوم ہوتا ہوں

الگ سب سے ہوں سب کے درمیاں معلوم ہوتا ہوں

کہاں پہنچا ہوا ہوں میں کہاں معلوم ہوتا ہوں

میں یوں تو زاہدو اک قطرۂ ناچیز ہوں بے شک

مگر پی لوں تو بحر بیکراں معلوم ہوتا ہوں

میں ہوں ہم بزم اہل دل بھی اور ہم بزم رنداں بھی

وہاں محسوس ہوتا ہوں یہاں معلوم ہوتا ہوں

در جاناں پہ جس دم ٹیک دیتا ہوں جبیں اپنی

سر عرش بریں پھر بے گماں معلوم ہوتا ہوں

تصور نے کسی کے میری دنیا ہی بدل ڈالی

کہاں معلوم ہوتا تھا کہاں معلوم ہوتا ہوں

کسی کی یاد نے کیا رفتہ رفتہ کر دیا مجھ کو

بس اب اک پیکر وہم و گماں معلوم ہوتا ہوں