وہاں بھی کوئی بہہ کر اشک پہنچا ہے مگر اپنا

وہاں بھی کوئی بہہ کر اشک پہنچا ہے مگر اپنا

بہت یاد آ رہا ہے آج جو غربت میں گھر اپنا

لگا دے منہ سے خم ساقی کہ ہیں مدت کے پیاسے ہم

نہ ہو گا حلق بھی اس شیشۂ ساغر سے تر اپنا

یہ درد اے بد گماں کچھ دیکھنے کی چیز اگر ہوتی

میں رکھ دیتا ترے آگے کلیجہ چیر کر اپنا

تحیر یاس سوزش گریہ نالہ آہ غم حسرت

بہلتا ہے انہیں آٹھوں سے دل آٹھوں پہر اپنا

نہ بے‌ دردی سے جا یوں نیم بسمل چھوڑ کر ظالم

ترے قربان ہاں اک اور بھی تیر نظر اپنا

شب وصل اس کو کب کافی ہے روز حشر سن لینا

بہت افسانہ طولانی ہے قصہ مختصر اپنا

وہ سودا دے مجھے جس کا اثر جمعیت دل ہو

بنا دے اے خدا مجذوبؔ کو آشفتہ سر اپنا