ہر طرح زمانہ کے ہاتھوں سے ستم دیدہ

ہر طرح زمانہ کے ہاتھوں سے ستم دیدہ

گر دل ہوں تو آزردہ خاطر ہوں تو رنجیدہ

ہم گلشن دوراں میں اے خفتگیٔ طالع

سر سبز تو ہیں لیکن جوں سبزۂ خوابیدہ

اے شور قیادت رہ اودھر ہی میں کہتا ہوں

چونکے ہے ابھی یاں سے کوئی دل شوریدہ

اوروں سے تو ہنستے ہو نظروں سے ملا نظریں

ایدھر کو نظر کوئی پھینکی بھی تو دزدیدہ

مجھ پر بھی تو یہ عقدہ تو کھول صبا بارے

زلفوں نے کسے بھیجا یہ نامۂ پیچیدہ

بد خواہ سبھی عالم گو ہووے تو ہو لیکن

یا رب نہ کسی کے ہوں دشمن یہ دل و دیدہ

کرتا ہے جگہ دل میں جوں ابرؤے پیوستہ

اے دردؔ یہ تیرا تو ہر مصرعۂ چسپیدہ