کب ترا دیوانہ آوے قید میں تدبیر سے

کب ترا دیوانہ آوے قید میں تدبیر سے

جوں صدا نکلا ہی چاہے خانۂ زنجیر سے

قدر مردوں کی سمجھنے کے نہیں یہ مایہ دار

جوہری واقف نہ ہووے جوہر شمشیر سے

دیکھنا تو آ کے از خود رفتگاں کا حال ٹک

جا بجا سب پشت بر دیوار ہیں تصویر سے

منعم ایسے قصر لاکھوں مل گئے ہیں خاک میں

جز خرابی کے بتا کیا فائدہ تعمیر سے

دردؔ اب ہنستے ہیں رونے پر مرے سب خاص و عام

کیا ہوئے وہ نالے جو لگتے تھے دل میں تیر سے