جوں سخن اب یاد اک عالم رہے

جوں سخن اب یاد اک عالم رہے

زندگانی تو چلی جا ہم رہے

تا ابد جوں قطرہ مجھ سا منفعل

جس جگہ سجدہ کرے وہ نم رہے

بہہ چلا آنکھوں سے دل ہو کر گداز

منہ پر آکر جم رہے تو جم رہے

رک نہیں سکتی ہے یاں کی واردات

کب یہ ہو سکتا ہے دریا تھم رہے

ہے زمانہ وہ کہ مثل آسماں

جس کے آگے اہل رفعت خم رہے

ہم ہی اس وحشت سرا سے ہیں اداس

اور بھی جو آئے سو یاں کم رہے

ہے محال عقل زیر آسماں

حرص ہو جس دل میں وہ خرم رہے

کبک آتش کیا کرے یوں قہقہے

چیونٹیوں کے گھر سدا ماتم رہے

رکھ نفخت فیہ من روحی کو یاد

جب تلک اے دردؔ دم میں دم رہے