گر خاک مری سرمۂ ابصار نہ ہووے

گر خاک مری سرمۂ ابصار نہ ہووے

تو کوئی نظر قابل دیدار نہ ہووے

سر رشتۂ الفت ہے بڑا شیخ و برہمن

یہ رشتہ بجز سبحہ و زنار نہ ہووے

گر قید ہی قسمت میں ہے کچھ اور ہو یارب

پر دل تو کسو دل سے گرفتار نہ ہووے

پھر موت کسی طرح تو نزدیک نہ پھٹکے

دنیا میں یہ جینے کا جو آزار نہ ہووے

دل ایسے ستمگار سے اظہار محبت

ایسا کہیں پھر دیکھیو زنہار نہ ہووے

کر زندگی اس طور سے اے دردؔ جہاں میں

خاطر پہ کسو شخص کے تو بار نہ ہووے