سر سبز تھا نیستاں میرے ہی اشک غم سے

سر سبز تھا نیستاں میرے ہی اشک غم سے

تھے سیکڑوں ہی نالے وابستہ ایک دم سے

واقف نہ یاں کسو سے ہم ہیں نہ کوئی ہم سے

یعنی کہ آ گئے ہیں بہکے ہوئے عدم سے

میں گو نہیں ازل سے پر تا ابد ہوں باقی

میرا حدوث آخر جاہی ٹھیرا قدم سے

گر چاہیے تو ملیے اور چاہیے نہ ملیے

سب تم سے ہو سکے ہے ممکن نہیں تو ہم سے

مشتاق گر ترا کچھ لکھے تو کیا عجب ہے

ہوں مثل نرگس آنکھیں پیدا ابھی قلم سے

ہر چند یہ تمنا در خور نہیں ہمارے

نزدیک تو جو آوے کیا دور ہے کرم سے

اب میں کہاں وہ نالے سرگشتگی کدھر ہے

تھیں سب وہ باتیں ثابت میرے ہی دم قدم سے

ہے اک نگاہ کانی گو ہووے گاہ گاہے

چنداں نہیں ہے مطلب عاشق کو بیش و کم سے

کاہے کو ہوتی ہم کو گردش نصیب طالع

گر پاؤں اپنا باہر رکھتے نہ ہم عدم سے

آتے ہیں دام میں کب خورشید رو کسو کے

اے شیخ یہ نہیں ہیں تسبیح کے سے شمسے

ہے دردؔ پر بھی کچھ تو میری ہی سی مصیبت

گھیرے ہے اور ہی غم چھوٹے جو ایک غم سے