جائے کس واسطے اے دردؔ مے خانے کے بیچ

جائے کس واسطے اے دردؔ مے خانے کے بیچ

اور ہی ہستی ہے اپنے دل کے پیمانے کے بیچ

آئینہ کی طرح غافل کھول چھاتی کے کواڑ

دیکھ تو ہے کون بارے تیرے کاشانے کے بیچ

سیر باغ بوستاں تو ہے میسر ہر گھڑی

آئیے گاہے فقیروں کے بھی کاشانے کے بیچ

جو مزے ہیں مرگ میں سو ہم سے پوچھا چاہیے

کون جانے آہ کیا لذت ہے مر جانے کے بیچ

عقدۂ دل کھول مثل قطرہ ناداں کب تلک

جوں گہر غلطاں رہے گا آب اور دانے کے بیچ

پیچ و تاب اتنا جو ہے یاں اس دل صد چاک‌ کو

زلف الجھی ہے کسو کی ظاہراً شانے کے بیچ

بخت خواب آلود نے میرے سلایا اس کو دردؔ

ورنہ پھونکا تھا ہی افسوں میں نے افسانے کے بیچ