کچھ دل ہی باغ میں نہیں تنہا شکستہ دل

کچھ دل ہی باغ میں نہیں تنہا شکستہ دل

ہر غنچہ دیکھتا ہوں تو ہے گا شکستہ دل

ہاتھوں سے محتسب کے ہیں اب مے کدہ کے بیچ

ساغر شکستہ خاطر و مینا شکستہ دل

شادی کی اور غم کی ہے دنیا میں ایک شکل

گل کو شگفتہ دل کہو تم یا شکستہ دل

یا رب درست گو نہ رہوں تیرے عہد پر

بندہ سے پر نہ ہو کوئی بندہ شکستہ دل

کی جس کی جوں حباب زمانے نے دل دہی

چھوڑا نہ پھر اسے نہ کیا تا شکستہ دل

لازم ہے گوشۂ شکن زلف میں تری

ظالم کوئی پڑا رہے مجھ سا شکستہ دل

سب خون دل ٹپک ہی گیا بوند بوند کر

اے دردؔ بسکہ عشق سے میں تھا شکستہ دل