میں تو ہوں ظاہر پہ میرا کچھ نشاں ملتا نہیں

میں تو ہوں ظاہر پہ میرا کچھ نشاں ملتا نہیں

لا مکاں میں ہوں کہ یاں میرا مکاں ملتا نہیں

خلق میں مشہور ہے اک نام خالق کا بڑا

ڈھونڈھتا ہوں میں وہاں سے تا یہاں ملتا نہیں

کہہ دیا نزدیک ہوں میں اس کے جو ڈھونڈھے مجھے

پھر بھلا کس واسطے اے مہرباں ملتا نہیں

جاؤں میں تالاش کو اب کس طرف اے ہمدمو

راہ میں بھی ساتھ کوئی کارواں ملتا نہیں

بعد مرنے کے نہ دیکھا پھر کسی کو آن کر

کوئی بھی اک بار بہر امتحاں ملتا نہیں

واعظو لازم ہے تم کو خوب پہچانو اسے

خالی بکنے سے تمہیں دونوں جہاں ملتا نہیں

عرش سے لے فرش تک کس کو نہیں تالاش ہے

پر کہیں مسکیںؔ تمھیں وہ جانستاں ملتا نہیں