بہاروں میں رہا کرتا ہے ان کا انتظار اب بھی

بہاروں میں رہا کرتا ہے ان کا انتظار اب بھی

وہ آ جائیں بیابانوں میں تو آ جائے بہار اب بھی

در و دیوار زنداں پر ہیں کچھ نقش و نگار اب بھی

بہار اب مٹ چکی باقی ہے تصویر بہار اب بھی

بھلا کیوں کر نہ اب بھی مجھ کو ان کا اعتبار آئے

وہ کہتے ہیں نہیں ہے تم کو میرا اعتبار اب بھی

میری آنکھوں میں آنسو ہیں تبسم ان کے ہونٹوں پر

خزاں اپنی جگہ اپنے ٹھکانے ہے بہار اب بھی

نہیں معلوم کس کا انتظار اس دل کو رہتا ہے

مگر اس دل کو رہتا ہے کسی کا انتظار اب بھی

کوئی ملتا تو اتنا پوچھ لیتے ان سے اے ناظرؔ

ہمارا ذکر کرتے ہیں ہمارے غم گسار اب بھی