آنکھوں کی تیری گردش سرشار دیکھ کر

آنکھوں کی تیری گردش سرشار دیکھ کر

اندھی ہوئی ہے نرگس بیمار دیکھ کر

کہتا ہوں سب کو ایک ہی لاٹھی نہ ہانکئے

کیجے سلوک ہر کسی سے یار دیکھ کر

اے ہم نفس یہ کہیو کہ آنکھوں میں دم ہے آ

ہو جاوے خوش وہ آخری دیدار دیکھ کر

پھولوں کا ہار گوندھ کے آیا تھا یار پاس

وہ تو گلے کا ہار ہوا ہار دیکھ کر

آیا جو مست ناز وہ خوباں روزگار

پامال ہو گئے ہیں یہ رفتار دیکھ کر

دل میں خیال تھا کہ اسے کچھ کہیں گے عشقؔ

منہ دیکھ رہ گئے اسے ناچار دیکھ کر