کافر عشق کو یارو نہیں اسلام سے کام

کافر عشق کو یارو نہیں اسلام سے کام

گردش چشم سے مطلب ہے نہیں جام سے کام

دم غنیمت وہ سمجھتا ہے جو یاں عاقل ہے

ہے وہ غافل جسے آغاز اور انجام سے کام

حسن مطلق نے مقید کیا تقلید کے بیچ

کس طرح دل کو نہ ہو اس بت خود کام سے کام

دیر و کعبہ سے صنم تو ہی ہے مقصود مجھے

اس سبب دل کو نہیں کفر اور اسلام سے کام

عشق کے قتل کو ابرو ہی ترے کافی ہیں

اس کو ہرگز نہیں قاتل کسی صمصام سے کام