عشق کا میں پیا ہے جام عقل کہاں اور میں کہاں

عشق کا میں پیا ہے جام عقل کہاں اور میں کہاں

دور ہوا ہے ننگ و نام عقل کہاں اور میں کہاں

عقل تو یاں ہوئی ہے دنگ ہوش کا اڑ گیا ہے رنگ

صبر مرا ہوا ہے تنگ عقل کہاں اور میں کہاں

عشق کی میں ہوا زباں عقل کا پھونکا خانماں

ہے یہ عیاں نہیں نہاں عقل کہاں اور میں کہاں

کیا کہوں اب کہاں ہوں میں دیکھو گے جو جہاں ہوں میں

آئینۂ جہاں ہوں میں عقل کہاں اور میں کہاں

جام ہوں یا شراب ہوں گوہر ہوں یا حباب ہوں

کیا کہوں آب آب ہوں عقل کہاں اور میں کہاں

مجھ سے دو چار عشق ہے صاحب کار عشقؔ ہے

ہمدم دیار عشق ہے عقل کہاں اور میں کہاں