حقیقتوں میں تمہیں ہو تصوّرات میں تم

حقیقتوں میں تمہیں ہو تصورات میں تم

میرے قریب ہو اتنے میری حیات میں تم

میں منزلوں سے بھٹک جاؤں غیر ممکن ہے

ہو میری روح میں موجود میری ذات میں تم

یہ گردشیں میرے دامن کو چھو نہیں سکتیں

مجھے یقین ہے جب تک ہو میرے ساتھ میں تم

تلاش کر کے بھی دیکھا نہیں ملا تم سا

وہ ایک حسن مجسم ہو کائنات میں تم

تمہارا ذکر میری زندگی کا مقصد ہے

ہر ایک شعر میں تم ہو ہر ایک بات میں تم

ہر ایک دن ہے تیری جستجو تیری چاہت

جنون عشق کی شامل ہر ایک رات میں تم

تمہارے قرب کا حاصل میری ضمانت ہے

قضا کے وقت بھی شایاںؔ کی نجات میں تم