تماشا دیکھنا ہے وہ اثر اس چشمِ جادو میں

تماشا دیکھنا ہے وہ اثر اس چشمِ جادو میں

اشارے سے کرے گی رقص پتلی چشمِ آہو میں

میں وہ ہوں دشتِ پیما ذکر میرا گر کرے کوئی

پڑیں کانٹے زباں میں آ بلے پڑ جائیں تالو میں

صفائی جس قدر اس میں ہے اتنے پیچ ہیں اس میں

پھسل کر تیرے چہرے سے نگہ پھنستی ہے گیسو میں

جبیں والفجر ہے واللیل گیسوئے معنبر ہے

خطِ رخ سورۂ یوسف ہے ان کے مصحفِ رو میں

جو ہیں خوش چشم انہیں کیا احتیاج زیب و زینت ہے

کوئی سرمہ لگاتا ہے بھلا کب چشمِ آہو میں

دکھاؤں دیدۂ حیراں کا اس خود بیں کو آئینہ

دل صد چاک سے شانہ کروں میں اس کے گیسو میں

وزیرؔ آغوش یاں فرقت میں بھی خالی نہیں رہتی

انہیں ہے یار اگر تو درد ہے مدت سے پہلو میں