نوجوانوں سے تہی پایا کنار پیر کو

نوجوانوں سے تہی پایا کنار پیر کو

اس گماں میں عمر بھر ہم نے نہ دیکھا تیر کو

ترچھی نظروں سے نہ دیکھو عاشق دلگیر کو

کیسے تیر انداز ہو سیدھا تو کر لو تیر کو

ہوں میں دیوانہ مری تصویر بھی تنکے چنے

کہربا کے رنگ سے کھینچو مری تصویر کو

تو نہ بوسہ دے سکا لیکن ترے دیوانے نے

سر دیا شمشیر کو اور دست و پا زنجیر کو

حال اس غفلت کدے کا تھا عیاں روز الست

خواب دیکھا بعد پہلے سن لیا تعبیر کو

دامن اس گل کا جو اٹکا پھر کے دیکھا ناز سے

دے اب اے بلبل دعائیں خار دامن گیر کو

پاؤں پر دشمن گرے تو جان فکر سر میں ہے

مت سمجھ بے وجہ پائے شمع پر گل گیر کو