مرتبہ پاتا ہے دست سیم بر میں آئینہ

مرتبہ پاتا ہے دست سیم بر میں آئینہ

صاف آتا ہے نظر چاندی کے گھر میں آئینہ

کون دیکھے گا الٰہی اپنے منہ کو وقت صبح

شام ہی سے ہے تمنائے سحر میں آئینہ

دے کے دل اس سنگ دل کو سخت پچھتاتا ہوں میں

کیوں دیا میں نے کف بیداد گر میں آئینہ

ذوق ایسا خود نمائی کا ہے روئے یار کو

بن گیا مصحف رجب میں اور سفر میں آئینہ

پرتو رخسار جاناں جلوہ گر ہر شے میں ہے

آنکھ ہو تو دیکھ ہر برگ شجر میں آئینہ

لکھ سکا خط میں نہ جب وصف صفائے روئے یار

دے دیا آخر کو دست نامہ بر میں آئینہ

رکھ کے عارض اس پہ سویا تھا جو وہ آئینہ رو

بن گیا گل تکیہ اس کا رات بھر میں آئینہ