کس کس ادا سے زینت کون و مکاں رہے

کس کس ادا سے زینت کون و مکاں رہے

ہم گل بنے بہار ہوئے باغباں رہے

اس درجہ دشمنی تو مقدر کی بات ہے

ورنہ وہ ایک عمر مرے رازداں رہے

اے دل تمام رات کٹی ان کی یاد میں

اب دو گھڑی تو اور کوئی داستاں رہے

میں اور احتیاط محبت کی راہ میں

یہ کہیے وہ تو خود ہی مرے پاسباں رہے

ہے اس کی خاک میں مری عمروں کا رنگ و بو

میرا وطن الٰہی ہمیشہ جواں رہے

اہل حرم وہاں ہیں یہاں اہل دیر ہیں

اب کس سے جا کے پوچھئے انساں کہاں رہے