یار بن کس کو سناؤں دل کا مطلب دل کی بات

یار بن کس کو سناؤں دل کا مطلب دل کی بات

اور کس سے جا کے پاؤں دل کا مطلب دل کی بات

گر ملے اک بار مجھ کو وہ پری وش کج ادا

اس کو ظاہر کر دکھاؤں دل کا مطلب دل کی بات

خاک صحراؤں کی چھانی سیم بر کے واسطے

اس ہی مہ رو کو بتاؤں دل کا مطلب دل کی بات

خوبرو کا دیکھنا ہی خوب ہے اے خوب خو

اس خوش آئین کو بتاؤں دل کا مطلب دل کی بات

جاہل و غافل ہیں سارے عقل کے اندھے یہاں

عاقلوں کے پاس گاؤں دل کا مطلب دل کی بات

شیر اور کتے کے باہم دوستی ہوتی نہیں

بے خرد کو کیا سناؤں دل کا مطلب دل کی بات

عارفاؔ جس سے لگا دل بس وہی ہے دل ربا

دل ربا کو ہی جتاؤں دل کا مطلب دل کی بات