کچھ نہیں کھلتا مجھے میں کون ہوں

کچھ نہیں کھلتا مجھے میں کون ہوں

صورت حیرت ہوں یا شکل جنوں

عشق ہے سرمایۂ دیوانگی

سحر کب پاتا ہے اس کو اور فسوں

آہ و نالہ نے مجھے رسوا کیا

ورنہ پنہاں تھا مرا راز دروں

گر نہ بہتے لخت دل آنکھوں کی راہ

رشک اشک ایسا نہ ہوتا رشک خوں

حسن جاناں جلوہ گر ہر شے میں ہے

دید میں اپنے نہیں کوئی زبوں

کون پا سکتا ہے مجھ گم گشتہ کو

دین ڈھونڈھے آکے یا دنیائے دوں

جس نے پہچانا ہے اپنے آپ کو

ہے نیازؔ اپنے قدم پر سرنگوں