لبریز ہے آتش سے پیمانہ محبت کا

لبریز ہے آتش سے پیمانہ محبت کا

کون اس کو پیے ساقی دیوانہ محبت کا

جبریل کی طاقت کیا جو گرد پھرے اس کے

جس شمع پہ جلتا ہے پروانہ محبت کا

مشہور ہوئے قصے اس شخص کے عالم میں

دل دے کے سنا جس نے افسانہ محبت کا

کونین میں جو کچھ ہے سو اس میں سمایا ہے

کب عرش سے چھوٹا ہے کاشانہ محبت کا

اس کافر بے دیں کی کیا بات کہے کوئی

کعبہ کو بنا ڈالا بت خانہ محبت کا

اس جسم سے وہاں جانا ہے عشقؔ بڑی مشکل

افلاک سے بالاتر ہے مے خانہ محبت کا