تھا دل کو عشق سرمۂ چشم سیاہ کا

تھا دل کو عشق سرمۂ چشم سیاہ کا

نعرہ بلند ہو نہ سکا اپنی آہ کا

حامی خدا ہے آج بتو داد خواہ کا

جھنڈا گڑا ہے عرشِ معلّی پہ آہ کا

تو وہ بناچکے جو مجھے گرد راہ کا

تو پھر ہدف بھی کیجئے تیرِ نگاہ کا

دنبالہ ہے یہ سرمۂ چشم سیاہ کا

یا ہے نشان میل پرستاں کی راہ کا

دیوانہ ہوں میں آپ کی ترچھی نگاہ کا

ڈھیلا مجھے لگائے چشمِ سیاہ کا

سودا ہوا ہے یار کی زلفِ سیاہ کا

پھر سلسلہ بڑھا ہے مرے دل کی آہ کا

کاوا دکھا دو آج سمند نگاہ کا

باندھا ہے گھر جو حلقہ زلف سیاہ کا

کچھ غم نہیں فراق کے روز سیاہ کا

ہے دل میں عشق ایک بت رشک ماہ کا

ہاتھوں میں ان کے شوخیٔ رنگ حنا نہیں

ہتھے چڑھا ہے خون کسی بے گناہ کا

ہوتے ہیں قتل جنبشِ ابرو سے سیکڑوں

پھر ذکر کیا ہے آپ کی تیغِ نگاہ کا

پھاڑا ملائکہ نے مرا نامۂ عمل

جب ہو سکا حساب نہ جرم وگناہ کا

عشّاق مر رہے ہیں لگاوٹ پہ آج کل

انداز کچھ نیا ہے تمہاری نگاہ کا

افشاں کو ان کی ہم نے کہا نجم فرق داں

قائل ہوا ہے ہم سے منجم نگاہ کا

کرلیں گے بحث داور محشر کے سامنے

دیکھیں تو کیا بیان وہاں ہو گواہ کا

دل پیشکش ہے نذر ہے یہ جان زار بھی

لکھ دیں مگر حضور مچلکا نباہ کا

جب ہوگیا ہے دیدۂ گریاں سے سامنا

پانی ہوا ہے گھل کے دم ابرو سیاہ کا

کیا شب کو کٹ گیا مہ کامل بھی دیکھ کر

چمکا جو سر پہ ان کے ستارہ کلاہ کا

کیا چل رہی ہے تیغ لگاوٹ کی چال واہ

انداز اڑا لیا ہے تمہاری نگاہ کا

دل ہاتھ سے سمجھ کے حسینوں کو دیجئے

قصہ نہیں سنا ہے فرشتوں کی چاہ کا

بیعت مجھے بھی مشرب پیرِ مغاں میں ہے

ساقی ادھر بھی دور کرم کی نگاہ کا

کعبہ کنشت شیخ برہمن سے کام کیا

حافظ خدا ہے بندۂ بے دستگاہ کا

آخر پکار اٹھیں گے فرشتے بھی الاماں

قصہ کا گھر ہے شور مرے دل کی آہ کا

کچھ بھی حضیضِ گور کا اے منعمو خیال

دو دن فقط بلند ہے گوشہ کلاہ کا

الفتؔ سفر ہے دور کا منزل بھی ہے کڑی

تم کو خیال کچھ بھی نہیں زادِ راہ کا