ہے عشق کی نظروں میں بے شک وہی فرزانہ

ہے عشق کی نظروں میں بے شک وہی فرزانہ

دنیائے محبت میں کہلائے جو دیوانہ

ہوں رند خراباتی مشرب مرا رندانہ

بت خانہ ہو یا کعبہ ہر اک مرا مے خانہ

وہ ایک ہی مالک ہے ان دونوں مکانوں کا

کعبہ بھی اسی کا ہے جس کا ہے صنم خانہ

کچھ لطف اٹھا زاہد رندی کا مزا بھی چکھ

اک ہاتھ میں صہبا ہو اک ہاتھ میں پیمانہ

دونوں کی کشش سے میں ساکت ہوں جہاں پر ہوں

رخ ہے طرف کعبہ دل جانب مے خانہ

عشاق مناسب ہے لو چل کے سبق اس سے

تم سے کہیں بہتر ہے دل سوختہ پروانہ

پایا ہے لقب اچھا واللہ مبارک ہو

کہتے ہیں ندیمؔ اب تو سب آپ کو دیوانہ