عطا کی درد کو شدت غموں کو انتہا دی ہے

عطا کی درد کو شدت غموں کو انتہا دی ہے

وہ میرا دل ہے جس نے عشق کی دولت لٹا دی ہے

خوشی اہلِ چمن کو زخم دل نے بارہا دی ہے

ہنسے ہیں دیکھ کر غنچے کلی بھی مسکرا دی ہے

چمن والوں سے جب بھی میں نے اذنِ آشیاں مانگا

نفی میں شاخِ گل نے ہر دفعہ گردن ہلا دی ہے

رہے برق چمن بے فکر اپنے ہاتھ سے میں نے

نشیمن کیا ہے بنیادِ نشیمن تک مٹا دی ہے

نہ جس تک کارواں پہنچے نہ میرِ کارواں پہنچے

مری گمراہیوں نے مجھ کو وہ منزل دکھا دی ہے

تپشؔ دامن گل تر کا نظر آتا ہے انگارا

صبا نے آتشِ رنگ چمن کو وہ ہوا دی ہے