اور کچھ ہوگی جنوں کی مرے توقیر کہ بس

اور کچھ ہوگی جنوں کی مرے توقیر کہ بس

اور چومیں گے قدم حلقۂ زنجیر کہ بس

زندگانی کو غم عشق سے فرصت ہی نہیں

دوسری ہے کوئی اس خواب کی تعبیر کہ بس

آگیا ہوگا تمہیں اب تو تبسم کا شعور

اور دکھلاؤں میں زخم دل دلگیر کہ بس

لکھ دے ان کو بھی مرے نام تو احساں ہوگا

غم ہیں کچھ اور بھی اے کاتب تقدیر کہ بس

خون امید کے قطرات بھی بے رنگ ہیں اب

اور کھینچے گا تصور تری تصویر کہ بس

اے تپشؔ گردشِ دوراں سے یہ پوچھو تو کبھی

اور بھی ہے ترے ترکش میں کوئی تیر کہ بس