کوئی صورت میں ہو میں تا حد امکاں دیکھ لیتا ہوں

کوئی صورت میں ہو میں تا حد امکاں دیکھ لیتا ہوں

عیاں تو پھر عیاں ہے حسن پنہاں دیکھ لیتا ہوں

نہ جانے کیوں کھٹک جاتا ہے خار غم مرے دل میں

عدو کو جب چمن میں گل بداماں دیکھ لیتا ہوں

جھلک میری گنہ گاری میں بھی ہے پارسائی کی

میں رحمت کی طرف اے ذوق عصیاں دیکھ لیتا ہوں

میری آشفتہ حالی کو نہیں کچھ نہیں نیند کی حاجت

میں بیداری میں بھی خواب پریشاں دیکھ لیتا ہوں

خدا رکھے سلامت جذبۂ شوق جنوں تجھ کو

کہ تیرے فیض سے کوہ و بیاباں دیکھ لیتا ہوں

نظر ہٹ کر زمانے سے کرم پر تیرے جاتی ہے

اگر خالی کبھی میں اپنا داماں دیکھ لیتا ہوں

بڑھاتا ہوں اسی سے راہ رسم و آشنائی بھی

میں اے محفوظؔ جس انساں کو انساں دیکھ لیتا ہوں