گل بداماں، گل سراپا، گل ہی گل ہے خوئے دوست

گل بداماں، گل سراپا، گل ہی گل ہے خوئے دوست

بلکہ وہ گل ہی نہیں جس میں نہ ہو خوشبوئے دوست

گفتگو ہوتی ہے میری آج بھی چاروں پہر

جب بھی چاہا سامنے آتا رہا ہے روئے دوست

دل کا سودا ہوگیا تھا چار جب آنکھیں ہوئیں

چین اب ملتا نہیں جب تک نہ جاؤں سوئے دوست

بادشاہت بھی ملے تو ہے مرے کس کام کی

میں تو بننا چاہتا ہوں بس گدائے کوئے دوست

لذتوں میں ایک لذت کا نہیں کوئی جواب

جو مزا ملتا ہے مجھ کو بیٹھ کر پہلوئے دوست

جب بھی آنکھیں بند کیں، تھے سامنے ہفت آسماں

میں نے دیکھا ہے بہت نزدیک سے جادوئے دوست

کون گزرا ہے یہاں سے کیوں ہوا ہے عطر بیز

غور سے دیکھو کرشمہ ساز ہے گیسوئے دوست

ہم نے مانا ہم بہت کمزور ہیں نادار ہیں

بھول جاتے ہو بھلا تم کس طرح بازوئے دوست

عالمؔ گرگانوی نے شعر اچھے ہیں کہے

کاش ان الفاظ کی تشبیہ ہو لولوئے دوست