سلسلہ کیوں عرش تک پہنچے نہ میری آہ کا

سلسلہ کیوں عرش تک پہنچے نہ میری آہ کا

ثبت لوح دل پہ میرے نقش ہے اللہ کا

بعد مردن یاد میں اس کی خوشا اپنا عروج

بس کہ جسم زار اپنا ہے غبار اس راہ کا

صفحۂ دل پر مرے وحدت کی اس کی مہر ہے

داغ وہ رکھتی ہو جس سے ہے خجل رخ ماہ کا

پرتو توحید سے ہو کا سماں ہے آنکھ میں

صفحۂ قلب حزیں ہے نقش اس درگاہ کا

کیوں نہ محمودہ ہوں سارے مرحلے طے خیر سے

مجھ کو ورد اللہ کا ہے شغل بسم اللہ کا