یہ کیوں کہوں کہ نہیں آشنا زمانے میں

یہ کیوں کہوں کہ نہیں آشنا زمانے میں

وہی ہے کیف ہے جس کو مرے ستانے میں

خدا کے نام پہ کرتے ہیں ہم بتوں سے وفا

نہ ہو جو قدر وفا کی نہیں زمانے میں

ہمارا سوز بھی ہے زیب ہر بیاں لیکن

تمہیں ہو جان فسانہ ہر اک فسانے میں

شکن جبیں پہ ہے اور زیر لب تبسم ہے

نظر میں رحم تردد ہے رحم کھانے میں

خلش تو تھی میں خلش سے مگر فزوں تڑپا

اسے بھی آج مزا آگیا ستانے میں

ہے خانقاہ میں بے جا تلاش میکشؔ کی

ملیں گے آپ کو حضرت شراب خانے میں