وحشتوں میں دل کی جمعیت کا ساماں ہو گیا

وحشتوں میں دل کی جمعیت کا ساماں ہو گیا

آدمیت سے ہوا خارج تو انساں ہو گیا

بھر گئیں آنکھوں میں تیری بزم کی رنگینیاں

میں نے دیکھا جس بیاباں کو گلستاں ہو گیا

اس ادا سے میں نے دیکھے داغ اپنے خون کے

اک تماشا روز محشر ان کا داماں ہو گیا

کر چکے بس تم علاج درد پنہاں کر چکے

ہو گیا تم سے علاج درد پنہاں ہو گیا

ہے خیال انجام کا اے تف بر انجام خیال

دیکھ کر محفل کو میرا جی پریشاں ہو گیا

کون ہے ایسا پجاری دیر میں اب اے بتو

کیا کرو گے تم اگر میکشؔ مسلماں ہو گیا