پہلے میں نے جان دی تم پر ضرور اتنا تو ہے

پہلے میں نے جان دی تم پر ضرور اتنا تو ہے

اور جفا تم کو سکھائی ہاں قصور اتنا تو ہے

اب کہاں وہ روز عشرت اور کہاں ہیں ہم مگر

دل سے جاؤ گے کہاں دل میں سرور اتنا تو ہے

آپ کی محفل میں آنے کا ہوں میں مجرم مگر

آپ میرے دل میں کیوں آئے قصور اتنا تو ہے

شکل اس مہوش کی ہے ہر دم مرے پیش نظر

شب اندھیری ہی سہی فرقت کی نور اتنا تو ہے

شہرِ خاموشاں میں وہ تھامے جگر آئے ہیں آج

خیر جذب دل کا اے میکشؔ ظہور اتنا تو ہے