نقش کوئی میرے سجدوں کے سوا ملتا نہیں

نقش کوئی میرے سجدوں کے سوا ملتا نہیں

رہگزر میں اب تمہارا نقش پا ملتا نہیں

ٹوٹ کر بھی اک نگاہ ملتفت سے جڑ سکے

کوئی ایسا آئینہ دل کے سوا ملتا نہیں

ڈھونڈنے منزل کو کیا نکلوں وفور شوق میں

محویت یہ ہے کہ خود اپنا پتہ ملتا نہیں

یہ وہ نعمت ہے کہ ملتی ہے اچانک ہی کبھی

قدر کر اس کی کہ درد لا دوا ملتا نہیں

دہر میں میکش وفاداری کے جذبے اب کہاں

اس خرابے میں کہیں نقش وفا ملتا نہیں