میں بھول گیا تجھ میں محراب خدا خانہ

میں بھول گیا تجھ میں محراب خدا خانہ

اے سجدہ گہ عالم اے ابروئے جانانہ

وہ جلوۂ مستانہ وہ زلف پس شانہ

برباد کنِ کعبہ غارت گر بت خانہ

پیمانا کہاں تک ہے اے ساقئ مے خانہ

ہم نے تو نہیں پائی اب تک تہ پیمانہ

پہنچا دیا ساقی نے پایان حقیقت تک

پیمانہ بہ پیمانہ مے خانہ بہ میخانہ

تو حسن کے جلووں پر تھا خندہ بہ زیر لب

اب تھام ذرا دل کو اے زاہد فرزانہ

تبدیل ہوا میری گل گشتِ فضا میری

اک عشق کا افسانہ اک حسن کا کاشانہ

اک وجد ٹپکتا ہے ہر لفظِ محبت سے

ہے شعر نشورؔ آخر کس حسن کا افسانہ