یہ کعبہ سے اٹھ کر سحاب آ رہا ہے

یہ کعبہ سے اٹھ کر سحاب آ رہا ہے

کہ پھر دور میں انقلاب آ رہا ہے

حد عمر فانی ہے اب عہد پیری

تو کیوں یاد عہد شباب آ رہا ہے

نہ کر مجھ سے میرے گناہوں کی پرسش

کہ یاد حسرتوں کا حساب آ رہا ہے

ہیں طفلی ہی کی شوخیاں حشر آرا

قیامت کا فتنہ شباب آ رہا ہے

چمن کی ہوا ہے کہ زنجیر پیچاں

جہان جنوں پر عتاب آ رہا ہے

ہوا سے ہیں جنبش میں پھر ان کے گیسو

رخ ماہ پر پھر سحاب آ رہا ہے

یہ کس شوخ کی یاد آتی ہے پیہم

ہے رخصت سکوں اضطراب آ رہا ہے

مجیدؔ اپنی ہے سد رہ رو سیاہی

مجھے کعبہ جاتے حجاب آ رہا ہے