دیکھو صنم ہمارا کیا خوب بن کے آیا

دیکھو صنم ہمارا کیا خوب بن کے آیا

آدم میں آپ آیا انسان ہی کہلایا

سجدہ کیا اسی کو ساری ملائکہ نے

قرآن کی آیتوں میں مذکور جس کا آیا

معشوق کی صفت کو کیجیے بیاں کہاں تک

نیرنگیوں سے اپنی کیا کیا ہے رنگ لایا

اس شاہ سے ملے ہیں شاہ جہاں ہوئے ہیں

اس فقر کی بدولت کیا کیا مزہ اٹھایا

بھائی ہیں میرے دل کو پیاری ادائیں تیری

جب سے قدم پہ تیرے میں نے ہے سر جھکایا

سمجھو ذرا تو یارو تم شان احمدی کو

اللہ کس طرح سے ہر گھٹ میں ہے سمایا

مطلوب دل کے میرے حاصل ہوئے ہیں خادمؔ

محبوب نے ہے جب سے جلوہ ہمیں دکھایا