عشق میں آ کر تری از بسکہ غم کھاتے ہیں ہم

عشق میں آ کر تری از بسکہ غم کھاتے ہیں ہم

دل لگا کر تجھ سے پیارے اب تو پچھتاتے ہیں ہم

کیوں خفا رہتا ہے مجھ سے کیا خطا میری ہے یار

سچ بتا کیا ماجرا ہے اب تو گھبراتے ہیں ہم

چھوڑ کر دونوں جہاں کو مثل مجنوں ہو گئے

اب گدا ہیں تیرے در کے تیرے کہلاتے ہیں ہم

ساغر دل کو مئے وحدت سے تونے ہے بھرا

چاہو بولو یا نہ بولو اب تو چلاتے ہیں ہم

عرض خادمؔ کی یہی ہے اس کو سننا ہے ضرور

حضرت شاہ صفی تیرے ہی کہلاتے ہیں ہم