منزل عشق میں ہستی کا پتہ کچھ بھی نہیں

منزل عشق میں ہستی کا پتہ کچھ بھی نہیں

جلوے ہی جلوے ہیں جلووں کے سوا کچھ بھی نہیں

چین ہی چین ملا تم سے محبت کر کے

دولت عشق ملی گھر کا کیا کچھ بھی نہیں

ایک کھٹکا سا مرے دل کو لگا رہتا ہے

اور پوچھو کہ ہوا کیا تو ہوا کچھ بھی نہیں

ان کا خط آنے سے تسکین ہوئی تھی دل کو

جب یہ دیکھا کہ لکھا کیا تو لکھا کچھ بھی نہیں

اے رشیدؔ ہم کو تعجب ہے کہ ساز ہستی

جھنجھناتا ہے مگر اس کی صدا کچھ بھی نہیں