رنجشوں سے بھر گیا ہے دل کا یہ پیمانہ اب

رنجشوں سے بھر گیا ہے دل کا یہ پیمانہ اب

کیا قیامت ہے کہ اپنا ہو گیا بیگانہ اب

بھول کر جاتا نہیں ہے جانب مے خانہ اب

ہوش میں آنے لگا ہے آپ کا دیوانہ اب

ہاں جنون شوق کو سجدوں کی عادت ہو گئی

ہم سے چھوٹے گا نہیں سنگ در جانانہ اب

خواب میں پر نور چہرے کی زیارت ہو گئی

ہم پہ واجب ہو گیا ہے سجدۂ شکرانہ اب

پھول شبنم سبز موسم برگ گل خوشبو ہوا

مدتوں سے بھول بیٹھا ہے دل ویرانہ اب

اب ہوائیں خوب چلتی ہیں مرے دل میں ظفرؔ

بن گیا ہے دشت میں بھی یار کا کاشانہ اب