کر لوں اپنے میں تمہیں اے جان جاناں تو سہی

کر لوں اپنے میں تمہیں اے جان جاناں تو سہی

دل تمہارا بالکل اپنا کر دوں یکساں تو سہی

کب تلک نظروں سے میری تم رہو گے دور دور

پتلیوں میں لوں بٹھا اے میرے جاناں تو سہی

میں رہوں بے خود تمہیں ہو کار فرما سب مرے

چھوڑوں اپنا تم پہ بالکل ساز و ساماں تو سہی

تم کو لوں اور لوں تمہاری کل روش تب کل پڑے

لے کے بیٹھوں جب تمہارے سارے ارکاں تو سہی

گرد پھر پھر کر تمہارے حسرت دل لوں نکال

جب رہیں باقی نہ دل کے کوئی ارماں تو سہی

آنے دو اس گل بدن کو مجھ میں پورے حسن سے

عندلیب دل ہوں عالم مجھ پر نالاں تو سہی

حسن عالم سوز دیکھیں گر ترا شمس و قمر

گر پڑیں ہو کر خجل قدموں پر مرداںؔ تو سہی