کیا تو بھی تماشہ ہے اے جلوۂ جانانہ

کیا تو بھی تماشہ ہے اے جلوۂ جانانہ

پردہ میں تو تو خود ہے اور خلق ہے دیوانہ

تیری ہی تجلی ہے رونق رہ کاشانہ

آباد تجھی سے ہے یہ عالم ویرانہ

ادراک سے برتر ہے عالم متحیر ہے

تو کون ہے کیا شئے ہے حیران ہے فرزانہ

جاں دادۂ الفت ہوں وابستہ گیسو ہوں

آنکھوں میں مرے تو ہے مستانہ ہوں مستانہ

صوفی ہو برہمن ہو یا رند خراباتی

کعبہ ہو کلیسا ہو ہو شہر کہ ویرانہ

تو سب کی زباں پر ہے جلوہ ہے ترا ہرجا

سب کھیل ہیں یہ تیرے اے جلوۂ جانانہ

اس مشربؔ خستہ کی بس اتنی تمنا ہے

اپنے سے شناسا کر اغیار سے بیگانہ