شمیم دوست کیوں میری طرف باد صبا لائی

شمیم دوست کیوں میری طرف باد صبا لائی

مرے سر پر جنوں میں اور اک تازہ بلا لائی

میں دیوانہ تھا جتنا اس سے بڑھ کر اب ہوں دیوانہ

بلا پر اک بلا تازہ تری زلفِ دوتا لائی

محبت کی خطا کیا اس پہ ہے الزام کیوں ظالم

ترے کوچہ میں جو آیا اسے اس کی قضا لائی

جگہ بدلی تو کافر ہوگئے یہ ہو نہیں سکتا

صنم خانہ میں بھی زاہد ہمیں یادِ خدا لائی

بگاڑ اپنے مقدر کا بنا خود راہبر اپنا

تری شمشیر کے آگے مجھے میری قضا لائی

دہانِ زخم بسمل شکر کرتے ہیں ادا قاتل

تری شمشیر اپنے ساتھ دردِ لادوا لائی

کہاں کی تھی عداوت باد صر صر کو خدا جانے

جو اس کوچہ سے میری خاک کے ذرے اڑا لائی

گلہ کیا کیجیے مسعودؔ اپنی تیرہ بختی کا

نہ بعد مرگ بھی شمعِ مزار اک شب جلا لائی