عیاں جو حسنِ حقیقت طراز ہو جائے

عیاں جو حسنِ حقیقت طراز ہو جائے

جہاں پہ سجدہ کریں ہم نماز ہو جائے

تصورات کی دنیا میں ہیں وہ آئے ہوئے

الٰہی اور شبِ غم دراز ہو جائے

حضور ناز کریں ہم بھی اپنی قسمت پر

جو آپ سے کبھی حاصل نیاز ہو جائے

ہمارے زخموں کو حاجت نہیں ہے مرہم کی

بس اک نگاہِ کرم چارہ ساز ہو جائے

پڑا ہوا ہے کوئی در پہ اس تمنا میں

جو پائمال کرو سرفراز ہو جائے

وہ وقتِ نزع دکھا دیں جو چہرۂ تاباں

تمام عمر کی پوری نماز ہو جائے

عیوب اپنے نظر آئیں ہر گھڑی مسعودؔ

جو تم کو بھی نگہ امتیاز ہو جائے