موجوں کا یہ ستم بھی حبابوں پہ کم نہیں

موجوں کا یہ ستم بھی حبابوں پہ کم نہیں

ان کو ہلاک کرتی ہے یہ جن میں دم نہیں

رتبہ میں مرے دل سے زیادہ حرم نہیں

کعبہ یہ وہ ہے جس میں مقام صنم نہیں

کچھ شیخ سے غرض نہ برہمن سے کام ہے

ہم بادہ خوار ساکن دیر و حرم نہیں

فرہاد کی طرح میں کروں کیوں نہ سر فگار

کیا مرے پاس تیشۂ فولاد غم نہیں

تلچھٹ ہی دے جو مے نہیں دیتا ہے ساقیا

مجھ تشنہ لب پہ کیا ترا دست کرم نہیں

ساقی ملے گا خاک ہمیں مے کشی میں لطف

چھایا ہوا جو باغ پہ ابر کرم نہیں

دل لے کے میرا کیجیے پامال شوق سے

آزردہ میں حضور کے سر کی قسم نہیں

صیاد کے وہ گھر میں یہ گلچیں کی گود میں

کیا تفرقہ پڑا گل و بلبل بہم نہیں

وعدہ کیا ہے اس نے سلیمؔ آئے گا ضرور

کچھ اس سے ہم کو حاجت قول و قسم نہیں