تیرے وعدوں کا اعتبار کسے

تیرے وعدوں کا اعتبار کسے

گو کہ ہو تاب انتظار کسے

اک نظر بھی ہے دید مفت نظر

اتنی فرصت بھی اے شرار کسے

جوں نگیں یاں سوائے رو سیہی

دہر کرتا ہے نامدار کسے

دل تو ڈوبا اب اور دیکھیں ڈبائیں

یہ مری چشم اشکبار کسے

تیرے وعدوں کو میں سمجھتا ہوں

دھوکہ دیتا ہے میرے یار کسے

تو بغل سے گیا تھا دل بھی گیا

اور لے بیٹھوں درکنار کسے

میں تو کیا اور بھی سوائے صبا

تیرے کوچہ تلک گزار کسے

دیکھتا ہی نہیں وہ مست ناز

اور دکھلاؤں حال زار کسے

خوب دیکھے اثرؔ نے قول و قرار

اب ترے قول پر قرار کسے