بے کسی میں اثرؔ یگانہ ہے

بے کسی میں اثرؔ یگانہ ہے

دل بھی اس کا نہیں بیگانہ ہے

غرض آئینہ داریٔ دل سے

تیرا جلوہ تجھے دکھانا ہے

مثل نقش قدم میں جب تئیں ہوں

آنکھیں ہیں اور یہ آستانہ ہے

یہی تار نفس کی آمد و شد

جامۂ تن کا تانا بانا ہے

گلے ملنا نہ گو کہ ہاتھ لگے

لیک منظور دل ملانا ہے

نام عنقا نشان تیرے کا

جوں نگیں دل میں آشیانہ ہے

دوست دشمن سبھی ہوئے ہیں تیرے

کیا برائی کا اب زمانہ ہے

دل گم گشتہ کو میں ڈھونڈوں کہاں

نہ کہیں ٹھور نے ٹھکانہ ہے

ہے دیوانہ بہ کار خود ہشیار

یہ نہ سمجھو اثرؔ دیوانہ ہے