کبھو ہم سے بھی وفا کیجئے گا

کبھو ہم سے بھی وفا کیجئے گا

یا یہی جور و جفا کیجئے گا

دیکھیں دشنام کہاں تک دو گے

دم میں سو بار دعا کیجئے گا

نظر آتا ہے گرہ زلف سے کھول

ہر طرف فتنہ بپا کیجئے گا

جان و دل سے بھی گزر جائیں

اگر ایسا ہی خفا کیجئے گا

کی ہے بندے کے لیے یہ بے داد

رحم ٹک بہر خدا کیجئے گا

عشق کے صدمے اٹھاتا تھا دل

اب تو وہ بھی نہیں کیا کیجئے گا

اب تو ٹک میرا کہا کیجیے پھر

چاہئے گا سو کہا کیجئے گا

گو اسے اہل وفا سے ہے خلاف

آپ اثرؔ تو بھی وفا کیجئے گا