میرا الم الم نہیں میری خوشی خوشی نہیں

میرا الم الم نہیں میری خوشی خوشی نہیں

سامنے تو اگر نہیں زندگی زندگی نہیں

ناصحا آئے گا تجھے لطف نہ لطف خاص کا

تیری نگاہ میں اگر حسن کی روشنی نہیں

آہ نہ کر جگر جلا اپنی نظر نظر بنا

چارۂ درد خاص ہے عشق فسوں گری نہیں

کھل نہ سکے راز کچھ تجھ پر کمال عشق کا

ہرہر نفس تجھے اگر عشق میں بیکلی نہیں

دیر پہنچ حرم کو جا سر بہ سجود ہو تو کیا

دل کو ترے جو کھوج ہے کھوج وہ دل لگی نہیں

تیرا خیال تیری یاد تیری طلب بہ قید ہوش

بندۂ عشق کے لیے کھیل ہے بندگی نہیں

ہم نے قبول بارہا دیکھ لیا پرکھ لیا

داتا حسن کے لعل پر فیض کی کچھ کمی نہیں