قصۂ عشق نہیں بے اثری کا لکھا

قصۂ عشق نہیں بے اثری کا لکھا

اس کا ہر لفظ ہے خون جگری کا لکھا

لہلہاتے ہوئے باغوں سے زمیں پر آنا

یہ مقدر تھا خطائے بشری کا لکھا

پڑ گئی کون سی افتاد سفر کیا معلوم

ایک خط بھی نہ ملا ہم سفری کا لکھا

مٹ سکے گا نہ میرے دل سے کبھی نقش وفا

یہ ورق ہے تری کافر نظری کا لکھا

یوسفتاں نظر آتی ہے بساط گلشن

یہ صحیفہ ہے نسیم سحری کا لکھا

خامہ عشق نے معراجؔ سر لوح جبیں

حال پہلے مری شوریدہ سری کا لکھا